Mark 11
Jesus e ulu i Jerusalem i dono aali
(Matthew 21.1-11; Luke 19.28-40; John 12.12-19)
1I di nadau hoohoo adu gi Jerusalem baahi nia waahale Bethphage mo Bethany, digaula ne dau i di Gonduu Olib, gei Jesus ga hagau ana dama agoago dogolua gi hula i mua, 2ga helekai gi meemaa, “Hula gi di waahale deenaa i gulu mua. Goolua ma ga dau i golo, ga gidee tamaa-‘donkey’, digi hana tangada nonua, e daula i golo. Wwede ina, dagia mai. 3Maa tangada ga heeu boloo, Goolua e hai di gulu aha? Gei goolua ga helekai boloo, Di Tagi e hiihai e hai hegau i di maa, ga laha mai laa hagalee duai.” 4Gei meemaa ga hula, ga gidee di ‘donkey’ digi madua loo e daula i di ngudu di bontai di hale i taalinga di ala, ga wwede di maa. 5Hunu daangada i digau nogo tuu i golo ga heeu gi meemaa, “Goolua e wwede di ‘donkey’ eimaha?” 6Gei meemaa ga helekai nia helekai a Jesus ne hai, gei nia daane aalaa ga dumaalia gi meemaa gi hula ginaadou. 7Gei meemaa ga dagi mai tamaa-‘donkey’ gi Jesus, ga gahu di manu gi di gahu, gei Jesus ga gaga gi hongo di maa. 8Digau dogologo ga holo nadau gahu gi hongo di ala, gei hunu daangada e duuduu mai nadau manga laagau, e magamaga laa hongo di ala, e haaligi di ala. 9Digau ala e hula i mua mono gau ala e dagi mai muli, ga momoogo,“Hagaamuina God, God gi hagahumalia ina tangada dela e hanimoi i di ingoo o Dimaadua. a
10God gi hagahumalia ina tenua o tadau damana go David dela ga dae mai. Hagaamuina God!” 11Jesus ga ulu gi lodo Jerusalem, ga hana gi lodo di Hale Daumaha, ga madamada gi nia mee huogodoo ala i lodo. Ga hiahi ia di mee, gei mee ga hana gi daha mo di gowaa deelaa, ga hana gi Bethany mo ana dama agoago dilongoholu maa lua.
Jesus e hagahalaua di laagau-‘fig’
(Matthew 21.18,19)
12Dono daiaa, gei digaula ga hagatanga mai labelaa i Bethany, gei Jesus gu hiigai. 13Gei mee ga gidee di laagau-‘fig’ haga mogowaa, e dau logo ono lau, ga hanadu ginai belee mmada be ia e gida ana golee i di maa. Gei dono dau adu, nia lau hua i golo, idimaa, ma hagalee di madagoaa e hua ai nia ‘fig’. 14Jesus ga helekai gi di laagau-‘fig’, “Tangada e gai labelaa dana golee mai i di goe ai.” Gei ana dama agoago gu longono ginaadou a mee.Jesus e hana gi di Hale Daumaha
(Matthew 21.12-17; Luke 19.45-48; John 2.13-22)
15I di nadau dau adu hua gi Jerusalem, gei Jesus ga hana gi lodo di Hale Daumaha, ga hagabagi digau huogodoo ala e huihui mo di huihui gi daha nadau mee. Mee ga hulihuli gi lala nia deebele digau wawaaheei bahihadu, mo nia lohongo o digau hui mwuroi. 16Gei mee gu hagalee dumaalia gi tei dangada gi dagidagia ana mee i lodo di Hale Daumaha. 17Mee ga agoago gi digaula, “Ma gu hihi i lodo di Beebaa Dabu bolo God gu helekai: Dogu Hale Daumaha le e haga ingoo bolo di hale hai dalodalo ni digau henuailala huogodoo, gei goodou gu hai di maa di lohongo hai gaiaa!” b 18Nia dagi hai mee dabu, mono gau haga dondonu haganoho ga longono ginaadou nnelekai aanei, gei digaula ga daamada ga halahala di nadau hai belee daaligi a Jesus. Gei digaula e mmaadagu, idimaa, nia daangada dogologo e hagalabagau huoloo nia agoago a maa. 19Ga hiahi ia di mee, Jesus mo ana dama agoago ga hagatanga gi daha mo di waahale.Di agoago e hagatau gi di laagau-‘fig’
(Matthew 21.20-22)
20Hagaluada loo dono daiaa, i di nadau hula i hongo di ala, ga gidee di laagau-‘fig’ deelaa, la gu mae aga i lala. 21Peter ga langahia ga helekai gi Jesus, “Tangada Agoago, mmada gi di laagau dela ne hagahalaua kooe, gu mae!” 22Jesus ga helekai, “Hagadonu ina a God. 23Au e hagi adu gi donu gi goodou bolo tangada ma ga helekai gi di gonduu deenei boloo: Hana, doo gi lodo di moana, geia hagalee manawa logo, e haga donu hua bolo ma ga hai hua be ana helekai, gei di maa ga gila. c 24Deenei laa au e hagi adu bolo goodou ma ga dalodalo e madau di godou mee, hagadonu ina bolo goodou ga hai mee gi di mee dela e madau ai, gei di maa ga dugu adu gi goodou. 25Malaa, goodou ma ga tuu ga dalodalo, dumaalia gi nia hala o tangada ne hai adu. Gei di godou Damana i di langi ga dumaalia adu i godou ihala. d 26[Maa goodou hagalee dumaalia gi nia hala digau ala i golo, di godou Damana dela i di langi hagalee dumaalia gi godou hala.”]Di heeu di mogobuna dagi o Jesus
(Matthew 21.23-27; Luke 20.1-8)
27Digaula ga dau adu labelaa gi Jerusalem. Di madagoaa hua o Jesus e hanadu gi lodo di Hale Daumaha, gei nia dagi aamua hai mee dabu, mo digau haga dondonu haganoho, mo nia dagi mmaadua ga loomoi, 28ga heeu, “Ma di mogobuna dagi mai hee dela e hai ai au mee aanei? Ma koai ne dugu adu di mogobuna deenei?” 29Jesus ga helekai, “Au ga hai dagu heeu hua e dahi, maa goodou ga hagi mai, gei au ga hagi adu di mogobuna dagi aha dela e hai ai agu mee aanei: 30Hagia mai di mogobuna dagi a John dela e hai ana babdais, la mai baahi o God, be mai baahi tangada?” 31Digaula ga daamada ga lagamaaloo boloo, “Gidaadou la ga helekai bolo aha? Maa gidaadou ga helekai: Mai baahi o God, gei mee ga helekai: Malaa e aha goodou hagalee hagadonu a John? 32Maa gidaadou ga helekai boloo: Mai hua nia daangada...” (Digaula e mmaadagu i nia daangada, idimaa, e dogologo e hagadonu bolo John la di soukohp e donu.) 33Malaa, digaula ga helekai gi Jesus, “Gimaadou e de iloo.”Malaa Jesus ga helekai, “Au hogi hagalee hagi adu dogu mogobuna dagi la mai hee dela e hai agu mee aanei.”
Copyright information for
KPG